Təhsil sahəsində ixtisaslaşan Education HUB tərəfindən Peşə Təhsili üzrə Dövlət Agentliyi ilə əməkdaşlıqda 2023-cü ilin fevral-sentyabr aylarında Qəbələ Dövlət Peşə Təhsil Mərkəzi və İsmayıllı Dövlət Peşə Təhsil Mərkəzi ndə “Ucqar bölgələrdə incəsənət alətlərinin tətbiqinin inkişaf etdirilməsi” təşəbbüsü həyata keçiriləcək.
Təşəbbüs Avropa İttifaqı tərəfindən maliyyələşdirilən Şərq Tərəfdaşlığı Vətəndaş Cəmiyyəti Təqaüd proqramı - Eastern Partnership Civil Society Facility çərçivəsində həyata keçirilir.
Təşəbbüsün əsas məqsədi gəncləri layihələrin idarəolunmasına hazırlamaq və icma layihələri konsepsiyalarının öyrədilməsi, həmçinin incəsənət vasitələrindən istifadə etməklə sosial layihə idarəçiliyinə hazırlamaqdır.
29 mart 2023 tarixində “Ucqar bölgələrdə incəsənət alətlərinin tətbiqinin inkişaf etdirilməsi” təşəbbüsünün açılış tədbiri keçirilib.
Açılış nitqi zamanı Education HUB-ın Proqram Meneceri Gulnara İsmailova Education HUB-ın fəaliyyət istiqamətləri barədə məlumat verib. Təqaüd proqramının qalibi, layihə rəhbəri Orxan Məsimov təşəbbüs barədə ətraflı məlumat verərək növbəti aylardakı fəaliyyət cədvəli ilə tanış edib. Peşə Təhsili üzrə Dövlət Agentliyinin nümayəndəsi Nəriman Kərimli bu cür təşəbbüslərin vacibliyini vurğulayaraq agentliyin belə təşəbbüslərdə həmişə maraqlı olduğunu qeyd edib. Qəbələ Dövlət Peşə Təhsili mərkəzinin direktoru Qalib Nəbiyev və İsmayıllı Dövlət Peşə Təhsili mərkəzinin direktoru Cəlil Bağırov da çıxış edərək belə təşəbbüslərin tələbələrin sosial bacarıqlarının artırılmasına töhfə verdiyini və əmək bazarında rəqabətli olmalarına dəstək verəcəklərini qeyd ediblər.
Az
En